സത്യം വളച്ചു കെട്ടില്ലാതെ പറയുന്നത് 'കഥ'യാവുമോ? ഇത്തിരി പൊടിപ്പും തൊങ്ങലും സ്വന്തം ഭാവനയില്‍ കുരുത്തെടുത്ത ചമയങ്ങളും ചമല്‍ക്കാരങ്ങളും കഥാകാരന്റെ പണിപ്പുരയില്‍ ഉരുവപ്പെട്ടു വരണം. ജീവിതത്തില്‍ ഇന്നേ വരെ കഥയെഴുതിയിട്ടില്ല ....ഈ എഴുതുന്നത്‌ കഥയുമല്ല , 40 വര്ഷം കഴിഞ്ഞിട്ടും മനസ്സില്‍ നിന്ന് മാഞ്ഞു പോവാന്‍ മടിക്കുന്ന ഒരനുഭവം........... 1972 , സ്ഥിരം ജോലിയൊന്നും കിട്ടിയിട്ടില്ല. ഒന്നി
ന് പോന്ന ഒരു വാല്യക്കാരന്‍ പണിയൊന്നും ഇല്ലാതെ വീട്ടില്‍ നിന്നാല്‍ നാട്ടുകാര്‍ക്ക് 'സഹിക്കില്ലല്ലോ '! കാണുന്നവരൊക്കെ ചോദിക്കും ....അല്ല , പണി ഒന്നുമായില്ലേ ? ഇങ്ങനെ വീട്ടില്‍ നിന്നാല്‍ മതിയോ ? ...പോരെന്നു എനിക്ക് തന്നെ അറിയാം , പക്ഷെ എവിടെപ്പോവും? വെറും പത്താം ക്ലാസ്സ് കഴിഞ്ഞവന് അന്ന് ശ്രമിച്ചു നോക്കാവുന്ന ഒരേ ഒരു പണി കണക്കെഴുത്ത് , ഏതെങ്കിലും മുതലാളിമാരുടെ അടുത്ത് .അങ്ങനെയൊരു മുതലാളി പുഴക്കക്കരെ കാരശേരിയില്‍ ഉണ്ട് , അങ്ങോര്‍ക്ക് കര്‍ണ്ണാടകയില്‍ , മംഗലാപുരത്തിന് അടുത്ത് കുന്താപുരത്ത് ചായത്തോട്ടവും കൂപ്പും ടിമ്പര്‍ മില്ലും ഒക്കെയുണ്ട് . ആളെ കണ്ടാല്‍ ചിലപ്പോള്‍ റൈറ്റര് പണി കിട്ടിയേക്കും ...............കയ്യില്‍ നൂറ്റില്‍ ചില്വാനം ഉറുപ്പിക. മംഗലാപുരത്ത് വണ്ടിയിറങ്ങി , ചോദിച്ചറിഞ്ഞു കുന്താപുരത്ത് അങ്ങോരുടെ ആപ്പീസില്‍ എത്തിയപ്പോള്‍ മുതലാളി സ്ഥലത്തില്ല , എന്ന് വരുമെന്ന് അറിയില്ല , തല്ക്കാലം ഇവിടെ റൈറ്റര് പണിക്കു ആളെ ആവശ്യമില്ല ........എന്ത് ചെയ്യണം ?തിരിച്ചു പോയാല്‍ നാട്ടുകാരോട് 'സമാധാനം' പറയണം .......അപ്പോഴാണ്‌ നല്ല വെളുത്ത മുണ്ടും ഹാഫ് ഷര്‍ട്ടും ഇട്ട ഒരു മാന്യന്‍ , അടുത്ത് വരുന്നു , വിവരങ്ങള്‍ അന്യേഷിക്കുന്നു - ആനപ്പാപ്പാനാണ് , കുന്താപുരത്ത് നിന്നും അമ്പത് നാഴിക ദൂരെ നേരിയ എന്ന സ്ഥലത്ത് , വലിയൊരു മുതലാളിയുടെ അടുത്താണ് ആനയും പണിയും. പെട്ടെന്ന് നാട്ടിലൊന്നു പോവേണ്ടി വന്നു , '' മാഷ്‌ വിഷമിക്കേണ്ട , ഞാനൊരു കത്ത് തരാം , അത് എന്റെ മുതലാളിയുടെ റൈറ്റര് , മലയാളി , അച്യുതന്‍ സാറിനു കൊടുത്താല്‍ പണി ഉറപ്പു '' . രാവിലെ ഇവിടുന്നു പോവുന്ന ലോറിയില്‍ പോയാല്‍ മതി , ഞാന്‍ നേരത്തെ പോവും '' , ലോരിക്കാരനെ പരിചയപ്പെടുത്തി , പിന്നെ ഇത്തിരി 'മടിയോടെ ' മാഷിന്റെ കയ്യില്‍ കാശുണ്ടെങ്കില്‍ .... എന്തായാലും എനിക്ക് ജോലി ശരിയാക്കാന്‍ സഹായിച്ച മനുഷ്യന്‍ അല്ലെ , അഞ്ചു രൂപ കയ്യില്‍ വെച്ച് ബാക്കി അയാള്‍ക്ക്‌ കൊടുത്തു .....................നേരം വെളുത്തു . ലോറിയില്‍ നെരിയ എന്ന സ്ഥലത്തെത്തി , അച്യുതന്‍ റൈറ്റര് കുടുംബമായി താമസിക്കുന്ന വീട്ടില്‍ എത്തി , കത്ത് കൈമാറി.കത്ത് വായിക്കുമ്പോള്‍ മൂപ്പരുടെ മുഖത്ത് എനിക്ക് പിടികിട്ടാത്ത എന്തൊക്കെയോ ഭാവങ്ങള്‍.!(ഇങ്ങനെയൊരു സാധുവായിപ്പോയല്ലോ എന്നാവാം ).വീട്ടുകാരി ചായ കൊണ്ട് വരുന്നു .അത് കുടിച്ചു കഴിയും വരെ മൌനം. പിന്നെ ചോദിച്ചു -'' നിങ്ങള്‍ അയാള്‍ക്ക്‌ കാശൊന്നും കൊടുത്തിട്ടില്ലല്ലോ ''?.... കൊടുത്തു , അഞ്ചു രൂപ എന്റെ കയ്യില്‍ വെച്ച് ബാക്കി മുഴുവന്‍ .... മുഖവുരകള്‍ ഇല്ലാതെ അങ്ങൊരു കാര്യം പറഞ്ഞു '' നിങ്ങള്‍ കണ്ടയാള് ഇവിടെ പാപ്പാന്‍ ആയിരുന്നു , പലവട്ടം പറഞ്ഞിട്ടും മനസ്സിലാവാത്ത ഒടുക്കത്തെ കള്ളുകുടി കാരണം പറഞ്ഞു വിട്ടു ''...മാഷക്ക് പറ്റിയ പണിയൊന്നും ഇവിടെയില്ല , ഇവിടെ അടുത്ത് റോഡ്പണിക്കാര്‍ താമസിക്കുന്ന ഊട്ടുപുരയില്‍ ഉറങ്ങി നാളെ രാവിലെ തിരിച്ചു പൊയ്ക്കോള്ളൂ , കോഴിക്കോട്ടു എത്താനുള്ള വണ്ടിക്കൂലിയും തന്നു ആ നല്ല മനുഷ്യന്‍ ............... കോഴിക്കോട്ടെത്തി നാട്ടില്‍ പോവും മുന്പ് എനിക്ക് അയാളെ കാണണം , കൊടുത്ത കാശ് തിരിച്ചു വാങ്ങി പുളിച്ച നാല് ചീത്ത പറയണം ......നാരായണന്‍ മേസിരി തന്ന വിലാസം കയ്യിലുണ്ട് . നഗരത്തിന്റെ അതിര്‍ത്തിയില്‍ . സിറ്റി ബസ്സില്‍ കയറി അയാളുടെ നാട്ടില്‍ എത്തുന്നു .അവിടുത്തെ റേഷന്‍ കടക്കാരന്‍ കാണിച്ചു തന്നു - അതാ അവിടെയാണ് അയാളുടെ വീട് , അത് പക്ഷെ ഭാര്യ വീടാണെന്നു തോന്നുന്നു ''......കേറിച്ചെന്നു , ദൈന്യത തളം കെട്ടിയ മുഖത്തോടെ മൂന്നു കൊച്ചു കുട്ടികള്‍ , മുഷിഞ്ഞ മുണ്ടും ബ്ലൌസും ധരിച്ച ആ സ്ത്രീ അയാളുടെ ഭാര്യയായിരിക്കും ....''ഇത് മേസിരിയുടെ ........? ചോദ്യം മുഴുമിപ്പിക്കും മുന്പ് ആ സ്ത്രീ തന്റെ സങ്കടങ്ങളുടെ ഭാണ്ഡം അഴിക്കുകയാണ് '' അയാള് നിങ്ങളെയും പറ്റിച്ചു കാണും !ഇവിടെ എന്നെയും മക്കളെയും തിരിഞ്ഞു നോക്കാറില്ല , ഇവിടെ വന്നിട്ട് ആറു മാസം കഴിഞ്ഞു ,റേഷന്‍ വാങ്ങാനുള്ള കാശുണ്ടെങ്കില്‍ ...........'' ഒടുക്കം , ഞാനെന്റെ കീശ തപ്പി നോക്കി , ഉണ്ട് , നാട്ടിലേക്കുള്ള ബസ്സുകൂലി കഴിഞ്ഞാലും അവര്‍ക്ക് ഒരാഴ്ചത്തെ റേഷന്‍ വാങ്ങിക്കാം .......... തിരിച്ചു നടന്നു ഒരുപാട് പാഠങ്ങള്‍ പഠിച്ച മുതിര്‍ന്നൊരു മനുഷ്യനെപ്പോലെ .....ആ കുഞ്ഞുങ്ങളുടെ മനസ്സിന്റെ നന്മ കൊണ്ടാവും , ഏറെ വൈകാതെ ഞാനുമൊരു സര്‍ക്കാര്‍ ജോലിക്കാരനായി !!......................
No comments:
Post a Comment